Seðlabankinn hefur hafnað því að greiða Þorsteini Má Baldvinssyni, forstjóra Samherja, fimm milljónir króna vegna kostnaðar og miska sem málarekstur bankans hafði vegna meintra brota á lögum um gjaldeyrismál. Fjallað er um málið í Markaðnum í dag.

Þar kemur fram að Þorsteinn hafi boðist til að samþykkja fimm milljóna króna greiðslu vegna málsins en því hafi verið hafnað sem áður segir.

Í bréfi sem Steinar Þór Guðgeirsson, lögmaður Seðlabankans, undirritaði í lok júlímánaðar – og Markaðurinn hefur undir höndum – kemur fram að ekki verði séð að bankinn hafi með „saknæmum eða ólögmætum hætti“ haft afskipti af Þorsteini vegna meintra brota á ákvæðum gjaldeyrislaga og reglna settra á grundvelli þeirra.

Þorsteinn sendi erindi til Seðlabankans þann 23. maí síðastliðinn þar sem meðal annars kom fram að bankinn ætti að eiga frumkvæði að því að bjóða honum til viðræðna um bætur. Sagðist Þorsteinn una við fimm milljóna króna greiðslu, meðal annars vegna aðkeyptrar sérfræðiþjónustu til að halda uppi vörnum í málinu.

Eins og kunnugt er snýr málið að fimmtán milljóna króna stjórnvaldssekt sem Seðlabankinn lagði á Samherja. Héraðsdómur og síðar Hæstiréttur felldu sektina úr gildi.