Norður-Kórea stal 2 milljörðum dollara með tölvuárásum. Fjármagnið var notað til að fjármagna kjarnorkuáætlun landsins. Þetta kemur fram í nýrri leyniskýrslu Sameinuðu þjóðanna en fjölmiðlar hafa komist yfir hana. Í skýrslunni kemur fram að Norður-Kóreumenn hafi beint aðgerðum sínum að bönkum og rafmyntamörkuðum til að verða sér úti um fé.

BBC skýrir frá þessu. Segist BBC hafa heimildir fyrir að Sameinuðu þjóðirnar séu að rannsaka 35 tölvuárásir Norður-Kóreumanna.

Í skýrslunni, sem var send til þeirrar nefndar öryggisráðsins sem hefur eftirlit með refsiaðgerðum gegn Norður-Kóreu, kemur fram að stjórnvöld í Norður-Kóreu noti sífellt þróaðri aðferðir við tölvuárásir sínar sem beinist gegn bönkum og rafmyntamörkuðum. Einnig kemur fram að árásirnar á rafmyntamarkaðina afli Norður-Kóreu fjármagns sem er erfiðara að rekja og sætir minna opinberu eftirliti en fjármagn sem er stolið frá hefðbundnum bönkum.

Í skýrslunni er einnig fjallað um brot Norður-Kóreu á viðskiptabanni Sameinuðu þjóðanna en þarlend stjórnvöld eru sögð hafa orðið sér úti um búnað sem er nauðsynlegur við framleiðslu gjöreyðingarvopna.