Snemma í nótt var lögregla og sérsveit send að húsi í Berjarima í Grafarvogi. Íbúi í götunni tók meðfylgjandi myndir af aðgerðinni. Lögregla lokaði götunni og þrír menn voru handteknir. Mikil leynd hvílir yfir þessari aðgerð lögreglunnar og vildi Kristján Ólafur Guðnason aðstoðaryfirlögregluþjónn ekki veita neinar frekari upplýsingar umfram þær sem koma fram í dagbók lögreglunnar. Þar segir:

Þrír vistaðir í fangaklefa eftir aðgerð lögreglu og sérsveitar í austurbænum í nótt þar sem lögregla fékk tilkynningu um samkvæmishávaða í heimahúsi.

Aðspurður vildi Kristján ekki svara því hvort mennirnir hafi verið vopnaðir eða grunur vaknað um slíkt. Ljóst er að sérsveitin er ekki sjálfkrafa send á vettvang vegna kvartana um hávaða í heimahúsum en ekki er frekari upplýsingar að hafa frá lögreglu um málið.

UPPFÆRT: Íbúinn sem sendi myndirnar segist hafa heyrt lögregluna tala um einn vopnaðan mann í íbúð. Sérsveitin braut sér á endanum leið inn í íbúðina og fljótlega eftir þá innrás var allt yfirstaðið.