„Í prófum er maður líklegri til að borða extra óhollt, sofa minna og vera mega stressaður. Hjá sumum sem eru viðkvæmir fyrir sveppasýkingum á hún til að blossa upp,” segir kynfræðingurinn Sigga Dögg í Morgunþættinum Múslí en hugur hennar er hjá þeim námsmönnum sem hafa verið í prófum að undanförnu.

Prófatíð hefur nú staðið yfir hjá mörgum síðustu vikur og segir kynfræðingurinn að törninni fylgi meiri hætta á sveppasýkingum sökum þess hvernig streita veikir ónæmiskerfið. „Það eru kraumandi kynfæri að koma núna á markaðinn,“ segir hún hress.

Samkvæmt kynfræðingnum geta sýkingar og þurrkur á kynfærum leitt til sársaukafulls kynlíf og sé nauðsynlegt að vera meðvitaður um úrræði. „Það þarf fyrst að læra að útiloka ákveðna hluti og þá er hægt að vinna meira með það,” segir Sigga Dögg. „Þegar fólk upplifir svona tekur það hlutina svolítið inn á sig og hugsi: „Ó mæ god, hvað þýðir þetta?” Verður þetta alltaf svona? Er það bara eitt skipti? Skemmdi ég eitthvað? Gerði ég eitthvað?”

Sigga Dögg segir það vera algengara hjá stelpum og þykir strákar síður líklegri til að tala um sársauka í kynlífi. Þá segist hún vera lang oftast spurð út í píkusársauka í kynlífi og segir það algengt vandamál. Segir hún líka að það sé mikilvægt að fólk hugsi um hvort að það sé hægt að gera breytingar á kynlífinu til að minnka sársaukann. Til dæmis er mörgum sem finnst ekkert sársaukafullt að stunda munnmök þó „typpi-í-píku-kynlíf” sé vont.

Sjá einnig: Sigga Dögg brást vinkonu 

„Það er mikilvægt að nota ekki sápu á kynfærin og fara til læknis ef grunur liggur á sýkingu, þá þurfi báðir aðilar sem stunda kynlíf að taka lyf við sveppasýkingunni, annars fer hún ekki,” segir Sigga Dögg.

„Smurning skiptir svo sjúklega miklu máli. Sleipiefni getur stundum lagað sársauka þó það sé alls ekki lausnin við öllu þá er það góður staður til að byrja á,” bætir hún við hún ráðleggur fólki alltaf að nota sleipiefni og muna að prófa það á vörunum eða í munni áður en það er sett á kynfærin.

„Fólk þarf að læra inn á sinn líkama og tala um það við aðilann sem þau stunda kynlíf með.“