Breski uppistandarinn Ian Cognito er látinn. Hann tróð upp á barnum Atic í Bicester á Englandi á fimmtudagskvöld og fékk hjartaáfall á sviðinu.

Samkvæmt frétt BBC sat Ian á stól þegar hann fékk hjartaáfallið, en aðdáendur höfðu ekki hugmynd um að eitthvað væri raunverulega að og töldu að þetta væri hluti af atriðinu. Kallað var á sjúkrabíl og Ian úrskurðaður látinn á staðnum.

„Við héldum að þetta væri partur af sýningunni,“ segir John Ostojak, einn áhorfandi, í samtali við BBC og bætir við að það hafi verið óhugnaleg tilhugsun eftir á að horfa á mann deyja.

„Okkur var flökurt þegar við komum út. Við bara sátum þarna í fimm mínútur að horfa á hann og hlæja að honum.“

John segir enn fremur að Ian hafi grínast með að fá heilablóðfall tíu mínútum áður en hann hneig niður.