Sóknarmaðurinn Thomas Mikkelsen hefur krotað undir nýjan samning við Breiðablik í Pepsi Max deild karla.

Mikkelsen kom til Breiðabliks síðasta sumar en hann var aðeins með samning út næsta tímabil.

Eftir frábæra frammistöðu á síðasta ári hefur Mikkelsen gert þriggja ára samning við Breiðablik.

Mikkelsen skoraði 11 mörk í 13 leikjum fyrir Blika í deildinni í fyrra sem er frábær árangur.

Tilkynning Breiðabliks:

Þau frábæru tíðindi voru að berast að danska dýnamítið Thomas Mikkelsen hefur skrifað undir nýjan 3 ára samning við knattspyrnudeild Breiðabliks.

Núverandi samningur átti að renna út eftir þessa leiktíð þannig að Daninn sér sæng sína útbreidda í Kópavoginum næstu árin.

Daninn kom eins og hvítur stormsveipur inn í Pepsí-deildina í fyrra og skoraði 11 mörk í 13 leikjum fyrir Blikaliðið. Það var ekki síst fyrir hans tilstilli sem Breiðablik náði öðru sæti í deildinni og komst í úrslit í Mjólkurbikarnum.