Gylfi og Llorente launahæstir hjá Swansea – Þrír launahæstu ekki fastamenn í sínum liðum
Það er heldur betur fróðlegt að rýna í tölur sem breska dagblaðið The Times hefur tekið saman yfir launahæstu leikmenn hvers liðs í ensku úrvalsdeildinni. Athygli vekur að þrír launahæstu leikmenn deildarinnar hafa aðeins byrjað 24 leiki samtals. Og það er óhætt að kalla þá ofurlaunamenn.
Wayne Rooney, fyrirliði Manchester United, er langlaunahæsti leikmaður deildarinnar með 300 þúsund pund á VIKU eða sem nemur rúmlega 42 milljónum króna. En Rooney hefur aðeins komið við sögu í 17 úrvalsdeildarleikjum á tímabilinu og skorað tvö mörk. Samningur hans rennur út sumarið 2019 en Rooney hefur verið orðaður við kínversku deildina að undanförnu. Ekki einu sinni Zlatan Ibrahimovic eða Paul Pogba geta skákað honum í launum hjá United.
Yfirlit Times sýnir að United, Manchester City og Chelsea eru í algjörum sérflokki þegar kemur að launagreiðslum.
Hjá Chelsea er Cesc Fabregas, nokkuð óvænt, launahæsti leikmaður félagsins með 220 þúsund pund á viku eða sem nemur rúmlega 31 milljón króna. Yaya Toure er sá leikmaður sem næst kemst Rooney, með 240 þúsund pund á viku eða sem nemur tæpum 34 milljónum króna.
Þessir þrír launahæstu leikmenn deildarinnar hafa allir verið jaðarsettir hjá sínum félögum á tímabilinu. Fabregast hefur aðeins byrjað 5 leiki undir stjórn Antonio Conte og er fastlega búist við að hann yfirgefi herbúðir Chelsea í sumar. Rooney hefur byrjað átta leiki en Toure ellefu. Eftirr að hafa verið í frystikistunni hjá Pep Guardiola, stjóra City, framan af tímabilinu hefur Toure verið að fá tækifæri í byrjunarliðinu að undanförnu.
Félögin þrjú eru að greiða launahæstu leikmönnum sínum umtalsvert hærri laun en t.a.m. Liverpool, Arsenal og Tottenham þar sem launahæstu leikmenn þeirra fá að hámarki 150 þúsund pund.
Lægst eru launin hjá nýliðum Hull og Burnley, eins og kannski gefur að skilja, en íslenski landsliðsmaðurinn Jóhann Berg Guðmundsson leikur með síðarnefnda liðinu. Nýjasti liðsmaður Burnley, Robbie Brady, er þó launahæstur þar með 35 þúsund pund á viku (4,9 milljónir kr.), það sama og Abel Hernandez, launahæsti leikmaður Tígranna.
Gylfi Þór Sigurðsson kemst á listann sem launahæsti leikmaður Swansea ásamt spænska framherjanum Fernando Llorente. Þeir félagar eru sagðir fá 70 þúsund pund á viku, eða sem nemur ríflega 9,8 milljónum króna. Algjörlega hlutlaust mat á þeirri staðreynd, og listanum í heild, er að Gylfi á skilið launahækkun. Ef okkar maður heldur áfram að spila eins vel og hann hefur verið að gera á tímabilinu er þó ljóst að hans gæti beðið feitari launapakki í sumar ef stórliðin reyna að krækja í hann.
Tony Pulis kann að fá sem mest fyrir aurinn en launahæstu leikmenn West Brom, sem situr í 8. sæti deildarinnar, eru Skotarnir Darren Fletcher og James Morrison með 60 þúsund pund á viku (8,4 milljónir kr.).
Markvörðurinn Fraser Forster getur ekki kvartað undan launaumslaginu hjá Southampton sem telur 90 þúsund pund á viku (12,7 milljónir kr.).
Þá vekur ekki síður athygli að Christian Benteke, launahæsti leikmaður Crystal Palace, þénar jafnmikið og stjörnuleikmenn Tottenham, Harry Kane og Hugo Lloris (120 þúsund pund á viku/16,9 milljónir kr.) en hér fyrir neðan má sjá listann í heild sinni, í stafrófsröð eftir liðum.
Félag | Leikmaður | Vikulaun í £ | Vikulaun í ísl. kr. |
---|---|---|---|
Arsenal | Mesut Özil | £140.000 | 19,7 milljónir |
Bournemouth | Jack Wilshere | £80.000 | 11,3 milljónir |
Burnley | Robbie Brady | £35.000 | 4,9 milljónir |
Chelsea | Cesc Fàbregas | £220.000 | 31 milljón |
Crystal Palace | Christian Benteke | £120.000 | 16,9 milljónir |
Everton | Romelu Lukaku | £75.000 | 10,5 milljónir |
Hull | Abel Hernández | £35.000 | 4,9 milljónir |
Leicester | Jamie Vardy/Riyad Mahrez | £100.000 | 14,1 milljón |
Liverpool | Philippe Coutinho | £150.000 | 21,1 milljónir |
Manchester City | Yaya Touré/Sergio Agüero | £240.000 | 33,8 milljónir |
Manchester United | Wayne Rooney | £300.000 | 42,3 milljónir |
Middlesbrough | Álvaro Negredo | £100.000 | 14,1 milljón |
Southampton | Fraser Forster | £90.000 | 12,7 milljónir |
Stoke | Xherdan Shaqiri/Marko Arnautovic | £65.000 | 9,1 milljón |
Sunderland | Jermain Defoe | £70.000 | 9,8 milljónir |
Swansea | Fernando Llorente/Gylfi Sigurdsson | £70.000 | 9,8 milljónir |
Tottenham | Harry Kane/Hugo Lloris | £120.000 | 16,9 milljónir |
Watford: | Troy Deeney | £50.000 | 7 milljónir |
West Brom | Darren Fletcher/James Morrison | £65.000 | 9,1 milljón |
West Ham | Andy Carroll | £80.000 | 11,2 milljónir |