Sergio Canales, fyrrum leikmaður Real Madrid, hefur verið valinn í spænska landsliðshópinn.

Canales er 28 ára gamall miðjumaður en hann var talinn mikið undrabarn á sínum tíma og var keyptur til Real árið 2010.

Þar gekk lítið upp og var Canales svo seldur til Valencia árið 2012 þar sem hann spilaði 32 leiki.

Canales stoppaði hjá Valencia í tvö ár og samdi svo við Real Sociedad og síðar Real Betis.

Hann hefur verið frábær fyrir Betis á þessu tímabili og var óvænt kallaður í spænska landsliðshópinn fyrir komandi verkefni í undankeppni EM.

,,Ég var hættur að hugsa um landsliðið. Mig langaði alltaf að komast í aðalliðið eftir að hafa spilað með yngri liðunum,“ sagði Canales.

,,Það komu tímar þar sem mér fannst þetta ekki vera markmiðið lengur og aðrir fengu tækifæri fram yfir mig.“

,,Ég mun gefa 200 prósent í þetta verkefni. Það er magnað að fá loksins að njóta þess að vera hérna.“