Maurizio Sarri, stjóri Chelsea, hefur nefnt þá leikmenn sem hann er mest hrifinn af í ítalska boltanum.

Sarri þekkir ítalska boltann afar vel en hann náði til að mynda frábærum árangri með Napoli áður en hann tók við Chelsea.

Sarri hefur nú nefnt þrjá leikmenn sem hann telur vera bestu leikmenn Ítalíu og er spurning hvort hann reyni að fá einhvern af þeim til Englands.

,,Lorenzo Insigne er besti leikmaður Ítalíu í dag,“ sagði Sarri en hann vann með Insigne hjá Napoli.

,,Eftir Lorenzo myndi ég setja Federico Bernardeschi en hann er á góðri leið með að verða leikmaður í heimsklassa.“

,,Svo myndi ég bæta við Federico Chiesa. Hann býr yfir hreinum gæðum og er benskeyttur. Það þarf bara að fínpússa hann.“

Bernardeschi spilar með stórliði Juventus og er Chiesa á mála hjá liði Fiorentina.