Tímavélin:

Enskir knattspyrnuaðdáendur ættu að muna eftir þeim Richard Keys og Andy Gray sem störfuðu lengi saman hjá sjónvarpsstöðinni Sky Sports. Gray var til að mynda rödd tölvuleiksins FIFA ásamt Martin Tyler og þótti vera ansi fær í sínu starfi.

Gray og Keys voru lengi samstarfsfélagar hjá Sky en þeir unnu saman frá 1992 til 2011 áður en mistök voru gerð í beinni útsendingu og voru þeir látnir yfirgefa stöðina. Það var góð ástæða fyrir því en tvímenningarnir töluðu niður til kvenna og voru umsvifalaust reknir úr starfi.

Þeir ræddu línuvörðinn Sian Massey sem sá um að dæma leik í ensku úrvalsdeildinni, sem er efsta deild Englands.

Það er ekki algengt að konur fái að dæma leiki í þeirri deild en Massey er eina konan sem sinnir því starfi í dag. ,,Einhver þarf að koma sér þarna niður og útskýra rangstöðuregluna fyrir henni,“ sagði Keys við Gray en þeir voru vissir um að slökkt væri á míkrófóninum í beinni útsendingu.

,,Já ég veit, trúir þú þessu? Kvenkyns línuvörður? Það er nákvæmlega það sem ég var að segja, konur kunna ekki regluna. Af hverju köllum við þær línuverði?“ sagði Gray á móti.

Keys bætti svo við að leikurinn væri orðinn ‘klikkaður’ því kvenmenn mættu dæma leiki í efstu deild karla.

Keys reyndi að afsaka þessi ummæli stuttu síðar og sagði að um grín hafi verið að ræða. Sú afsökun fór þó ekki vel í marga. Sky var ekki lengi að taka á þessu máli en í fyrstu voru þeir settir í eins leiks bann áður en ákvörðun var tekinn um að rifta samningi þeirra við stöðina.

Undanfarin ár hafa þeir þó enn starfað saman í sjónvarpi og vinna fyrir stöðina beIN Sports.

Hér má heyra ummælin.