Foreldrar ungra drengja sem eru byrjaðir að venja sig á að pissa í klósettið vita eflaust margir að stundum koma slettur á gólfið og jafnvel bak við setuna. Ef þetta er ekki hreinsað strax getur komið hvimleið lykt sem erfitt er að losna við.
Nú hafa ástralskar mæður fundið lausnina á þessum vanda fyrir fullt og allt og er óhætt að segja að aðferðin hafi vakið talsverða athygli. Samkvæmt ráðinu dugar að úða raksápu á víð og dreif um salernisrýmið og láta hana standa þar í drykklanga stund áður en hún er þrifin upp.
Facebook-hópurinn Mums Who Clean er hópur um fjögur þúsund ástralskra mæðra og þar hefur þetta ráð slegið í gegn. Hafa fjölmargar mæður birt myndir þar sem búið er að dreifa raksápu upp um alla veggi, í orðsins fyllstu merkingu.
„Mig langar að þakka ykkur kærlega fyrir þetta ráð. Ég úðaði raksápu um allt, lét hana standa í nokkra klukkutíma. Ég dreifði úr henni og nuddaði henni á ákveðin svæði. Þegar ég þurrkaði hana upp var lyktin farin,“ segir ein móðirin.
Fjölmargir hafa tjáð sig um ráðið á samfélagsmiðlum, samkvæmt frétt Mail Online, og virðast flestir á því að ráðið virki vel. Samkvæmt þeim sem tjá sig er lykilatriði að láta raksápuna standa í nokkurn tíma, nokkrar klukkustundir jafnvel, áður en hún er þrifin upp.
