David Gaut, sem myrti lítið barn 1985, var í ágúst á síðasta ári ginntur í gildru í íbúð nágranna síns í New Tredegar í Caerphilly í Wales. Þar sátu þrír menn fyrir honum og stungu hann 150 sinnum. Á meðan á árásinn stóð öskraði Gaut á hjálp en það varð honum ekki til bjargar og lést hann.

Málið er nú fyrir dómi í Newport. Þar kom fram að Gaut hlaut lífstíðarfangelsisdóm í júlí 1985 fyrir að hafa myrt 17 mánaða dreng.

Í gær bar David Osborne, einn hinna ákærðu, vitni. Sky segir að hann hafi sagt að hann hafi verið inni í eldhúsi þegar hann heyrði Gaut öskra á hjálp eftir að Ieuan Harley, 23 ára, réðst á hann með hníf. Þriðji maðurinn, Darran Evesham, var sýknaður af morðákæru vegna skorts á sönnunum.

Osborne sagðist hafa heyrt menn rífast og öskra. Harley hafi snúið sér við og kallað Gaut barnaníðing. Síðan hafi hann heyrt djúpa innöndun og hljóð sem líktist einna helst þegar hnífur stingst inn í hold. Hann sagðist ekki hafa þorað að fara fram en hafi látið sig hafa það á endanum. Þá hafi Harley staðið yfir Gaut með blóðugan hníf. Síðan hafi Harley kropið við hlið Gaut og stungið hann margoft.

Osborne sagðist hafa farið á fyllerí í stað þess að hringja í lögregluna eftir að Harley sagði honum að þetta væri ekkert til að hafa áhyggjur af, þeir myndu þrífa þetta.

Evesham kom fljótlega á staðinn og hjálpaði þeim að flytja Gaut yfir í íbúð hans.