Brynjar Níelsson segist ekki hafa áttað sig á því að nein sérstök uppákoma væri í gangi þegar tveir þingmenn Pírata, Björn Leví Gunnarsson og Þórhildur Sunna Ævarsdóttir, stilltu sér upp með Fokk-ofbeldi húfur á höfðinu, hvort sínu megin við Bergþór Ólason er hann stóð í ræðustól Alþingis í gær. Með því virtust þau vera að mótmælta veru Bergþórs á Alþingi en hann er annar af tveimur mest áberandi aðilum í Klaustursupptökunum, þar sem hann fór meðal annars ófögrum orðum um Lilju Alfreðsdóttur, menntamálaráðherra. Á meðam uppákomunni stóð sat Brynjar í sæti þingforseta en aðhafðist ekkert.
Brynjar segist bara hafa séð Björn Leví með húfu og ekki áttað sig á að neinn gjörningur væri í gangi. Hann segir í samtali við DV:
„Hann hefur áður átt í vanda með að vera klæddur eins og aðrir þingmenn án athugasemda af hálfu þingforseta. Datt fyrst í hug að veðurfarið hefði meiri áhrif á hann en aðra. Var farinn úr forsetastól þegar ljóst var hvaða „sprell“ var í gangi og brást við því í samráði við aðra í forsetanefnd. Kom það í hlut Bryndísar að koma þeim viðbrögðum á framfæri enda tók hún við af mér skömmu eftir þessa uppákomu.“
Spurður um hvað honum hafi eftir á fundist um tiltækið segir Brynjar:
„Það sama og fram kom í yfirlýsingu þingforseta í stólnum, sem var borin undir mig áður en hún var lesin. Að öðru leyti tjái ég mig ekki um þetta.“