Óhætt er að segja að auglýsingaherferð VR, þar sem Jón Gnarr er í hlutverki Georgs Bjarnfreðarsonar, hafi vakið mikla athygli. Samtök verslunar og þjónustu hafa gagnrýnt herferðina og þá sérstaklega eina tiltekna auglýsingu.
Margrét Sanders, formaður samtakanna, var gestur Morgunútvarpsins á Rás 2 í morgun þar sem hún ræddi þetta. Í umræddri auglýsingu sem fer fyrir brjóstið á samtökunum freistar Georg, eigandi verslunarinnar Georgskjara, að draga salernisgjald og reiðhjólagjald af launum ungrar stúlku og býður að auki að hýsa hana á þröngum og lítt spennandi lager verslunarinnar. Það tilboð kom þegar stúlkan sagðist efast um að hafa efni á að leigja sér íbúð miðað við þau kjör sem henni stóðu til boða í versluninni.
Margrét sagði í morgun að atvinnurekendur væru teiknaðir upp sem vonda fólkið í auglýsingunni. Í þessari tilteknu auglýsingu sé gengið of langt en hinar auglýsingarnar fari ekki jafn langt og séu góðar og gildar.
„Að atvinnurekendur ætli sér að fara illa fólk, að þeim þyki ekki vænt um fólkið sitt, að atvinnurekendur vilji græða sem mest og henda fólkinu út í hafsauga, þarna fara menn of langt og það er það sem okkar fólk er bara mjög reitt yfir,“ sagði Margrét sem sneri dæminu við og sagði að eitthvað myndi heyrast í VR ef Samtök verslunar og þjónustu gerðu auglýsingar þar sem starfsmenn væru að stela úr verslunum.
Margrét segir að gagnrýni samtakanna snúi fyrst og fremst að þessari auglýsingu sem hafi verið áberandi upp á síðkastið. „Þeir keyrðu langmest á þessari auglýsingu, svo eru þeir snjallir núna, ég á von á því að það sé tilviljun, nú eru að koma auglýsingar sem eru allt annars eðlis en þeir byrja á þessum skúrki sem er hreinlega í brotastarfsemi,“ sagði Margrét.
Í grein sem Margrét og Andrés Magnússon, framkvæmdastjóri Samtaka verslunar og þjónustu, birtu í Morgunblaðinu í gær gagnrýndu þau herferð VR.
Í greininni sögðu þau meðal annars að það handrit að mannlegum harmleik sem sett væri á svið á kómískan en um leið gildishlaðinn hátt væri vandmeðfarið. Það sé ekki beint til þess fallið að gera gaman að.
„Við þekkjum a.m.k. ekki þann vinnuveitanda sem vill misbjóða starfsfólki sínu á þann veg sem þar er lýst. Þó að mörgum þyki þessar auglýsingar með þeim hætti að þær nái að kitla hláturtaugar hjá fólki er undirtónn þeirra og þau skilaboð sem þær senda mjög alvarleg árás á atvinnurekendur almennt.“
Auglýsinguna sem gagnrýnin beinist að má sjá hér að neðan. Hittir auglýsingin í mark eða er farið yfir strikið? Endilega segðu þína skoðun hér að neðan.
