Frá klukkan 19 til 22 í gærkvöldi bárust lögreglunni á höfuðborgarsvæðinu nokkrar tilkynningar vegna veðurs. Í Kópavogi fuku skilti og þakplötur. Í Grafarholti fauk hurð á bifreið upp. Í hverfi 104 í Reykjavík lét stórt tré undan veðurofsanum og í miðborginni fauk auglýsingadúkur.

Á tólfta tímanum í gærkvöldi var maður í annarlegu ástandi handtekinn í hverfi 101. Hann er grunaður um eignaspjöll, að hafa grýtt bifreið. Hann fór ekki að fyrirmælum lögreglu og var því handtekinn og vistaður í fangageymslu.

Á níunda tímanum í gærkvöldi var tilkynnt um umferðaróhapp í Kópavogi. Tjónvaldur er grunaður um að hafa verið undir áhrifum lyfja.

Tveir ökumenn voru handteknir í Breiðholti í nótt grunaðir um akstur undir áhrifum fíkniefna. Annar er einnig grunaður um vörslu fíkniefna og hinn um ítrekaðan akstur sviptur ökuréttindum.