„Í hvert skipti sem ég þarf að nota einhverja opinbera þjónustu þar sem kennitalan mín kemur við sögu, þá þarf ég að koma út úr skápnum fyrir fólki sem ég þekki ekkert. Hvort sem það er að sækja lyf í apótekið, koma við í banka, fara til læknis, þá er ég kölluð nafni sem ég samsvara mig ekki með.“

Þetta segir Sæborg Ninja Guðmundsdóttir, transkona, í nýju myndbandi YouTube-rásarinnar My Genderation.

Um er að ræða kvikmyndaverkefni sem einblínir á líf og upplifanir transfólks. Í lýsingu rásarinnar kemur fram að markmið hennar sé að útrýma staðalmyndum, mýtum og misskilningi sem oft er í garð transfólks.

Sæborg segir að henni líði ósýnilegri, að hún sé ekki viðstödd. „Ég er rangkynjuð og mér líður ömurlega. Mér líður eins og ég sé að svara fyrir manneskju sem ég er ekki,“ segir hún.

„Ef ég hefði sjálfsákvörðunarrétt, ef ég gæti sjálf skilgreint mitt eigið kyn án greininga og samþykkis annarra, þá væri ég ekki að glíma við þessa hluti. Þá gæti ég farið í banka og nafn mitt væri lesið upp. Ég fengi ekki kvíðahnút í hvert skipti sem ég þarf að sækja hormónana mína. Þá væri lífið mun léttara.“

Myndbandið í heild sinni má sjá að neðan.