Hagyrðingakvöld eru afar vinsæl á landsbyggðinni og vel sótt en þau eru mun sjaldgæfari í Reykjavík. Nú hafa nokkrir af bestu hagyrðingum landsins ákveðið að koma saman í Fáksheimilinu í Víðidal á morgun, fimmtudagskvöldið 8. nóvember klukkan 20, og kveðast á um hin ýmsu málefni líðandi stundar. Fréttamál undanfarinna daga verða klædd í vísnabúning til styrktar góðu málefni. Þá hefur almenningi undanfarna daga gefist kostur á að panta sérstaklega vísu um sín hugðarefni og greiða fyrir það frjálst framlag til SOS Barnaþorpanna á Íslandi. Frestur til að panta vísur rennur út kl. 14 á morgun.
Umræddir hagyrðingar eru Ómar Ragnarsson, Kristján Hreinsson, Sigurlína Davíðsdóttir og Sigurlín Hermannsdóttir og annar kunnur hagyrðingur, Ragnar Ingi Aðalsteinsson, verður kynnir og stjórnandi. Aðgangseyrir er 1500 krónur eða frjálst framlag og innifalið í því verði eru kaffi, kleinur og flatkökur með hangikjöti.
Allur ágóði af hagyrðingakvöldinu rennur til SOS Barnaþorpanna á Íslandi. SOS Children´s villages eru ein stærstu barnahjálparsamtök heims.
