Fyrrverandi Playboy-fyrirsætan og Strandvörðurinn Pamela Anderson er óhrædd við að synda gegn straumnum, eins og fram kemur í innslagi fréttaskýringaþáttarins 60 mínútur. Þar segir Pamela að #MeToo byltingin sé komin út í öfgar og telur hún að hreyfingin hafi hamlandi áhrif á samfélagið til lengdar, ekki síður karlmenn.

„Ég verð örugglega drepin fyrir að segja þetta, en móðir mín kenndi mér alltaf að fara aldrei upp á hótelherbergi með ókunnugum,“ segir hún. „Ég er sjálf femínisti en þessi þriðja bylgja femínismans þykir mér leiðinleg og mér finnst hún einfaldlega lama karlmenn.“

Í rómantískri baráttu 

Þá ræðir Pamela við fréttamann um samband sitt við Julian Assange, stofnanda WikiLeaks, sem hefur verið staddur í hæli í sendiráði Ekvadors í London undanfarin sex ár. Hann óttast að verða framseldur til Bandaríkjanna þar sem hann á yfir höfði sér langan fangelsisdóm.

Pamela segir manninn vera mikla hetju sem á meiri stuðning skilið frá ástralska ríkinu.

„Þessi maður fer í sögubækurnar. Við eigum að vera stolt af honum,“ segir hún og hvetur Scott Morrison, forsætisráðherra Ástralíu, til að veita Assange vegabréfið sitt til þess að hann geti snúið aftur til heimaslóða sinna. „Það á að halda skrúðgöngu fyrir þennan mann þegar hann losnar.“

Samkvæmt Pamelu ríkir heilmikið traust á milli þeirra Julian og vill hún meina að þau séu perluvinir, en gefur í skyn að meira sé þar á bak við. Þegar hún er spurð nánar að því hvers eðlis sambandið þeirra er svarar hún: „Við lítum á þetta sem rómantíska baráttu.“