Líkt og komið hefur fram hyggst Dorrit Moussaieff, fyrrum forsetafrú, klóna hundinn sinn Sám. Hefur hún þegar sent erfðaefni hundsins til Texas, þar sem hann verður klónaður eftir hans dag, en hann er ellefu ára.

Morgunblaðið greinir frá því í dag að slíkt klón muni kosta að minnsta kosti sex milljónir króna. Þá segir Arnar Pálsson, prófessor í lífupplýsingafræði, að ekki sé útséð með árangurinn:

„Þú þarft nokkrar milljónir til að fara í þetta og það er ekki víst að þetta heppnist.“

Arnar segir að með klónuninni verði eftirmyndin með sama erfðaefni og Sámur, rétt eins og eineggja tvíburi. Arnar segir þó að erfðaefnið sé aldrei nákvæmlega eins:

„Eiginleikar lífvera eru tilkomnir vegna gena, umhverfis, samspils gena og umhverfis og líka tilviljana. Í fyrsta lagi er erfðaefni tveggja einstaklinga, jafnvel klóna eða eineggja tvíbura, aldrei nákvæmlega eins. Við hverja skiptingu líkamsfruma geta orðið stökkbreytingar sem leiða til dæmis til erfðafræðilegs munar á eineggja tvíburum en einnig innan sama einstaklings. Í öðru lagi er umhverfi tveggja einstaklinga, jafnvel klóna eða eineggja, aldrei nákvæmlega eins. Annar tvíburinn fékk tvo sleikjóa, hinn var lengur í sólinni og brann, annar veiktist af flensunni tveggja ára en hinn ekki og svo framvegis. Milljónir ólíkra umhverfisþátta móta þannig klóna og engin leið er að tryggja að tveir einstaklingar alist upp og þroskist á nákvæmlega sama hátt,“

segir Arnar á Vísindavefnum.