Það vakti athygli um helgina þegar Ólafur Ragnar Grímsson fyrrverandi forseti Íslands greindi frá því í þætti Gísla Marteins og BJörgu Magnúsdóttur, Morgunkaffinu að hann og Dorritt hefðu ákveðið að klóna hundinn þeirra, Sám. Hundinn fengu þau þegar hann var árs gamall.

En nú er hundurinn farinn að eldast og Dorrit vill alls ekki missa Sám svo þau tóku þá ákvörðun að taka sýni af hús hans og senda til Texas. Þar verða frumur hans ræktaðar.

„Sámur er orðinn gamall,11 ára þannig að Dorrit ákvað að láta klóna hann. Það eru tvö fyrirtæki í heiminum sem klóna hunda. Annað er í Texas og hitt er í Suður-Kóreu og það er semsagt búið að því.“

Bætti Ólafur við að nýr Sámur yrði ekki pantaður fyrr en sá upprunalegi væri dauður.

„Ég veit þá ekki hvort að Sámur yrði þá fyrsti hundurinn á Íslandi sem væri klónaður. Það sem mér finnst  óhugnanlegra er að það er hægt að semja við fyrirtæki um að geyma sýnin í áraraðir gegn tiltölulega vægu gjaldi. Barnabörnin mín geta svo pantað sér nýjan Sám frá Texas þegar þau eru komin með heimili og fjölskyldu. Þetta er náttúrulega svolítið óhugnanleg veröld.“

Miklar umræður um þessa ákvörðun hjónanna hafa átt sér stað á samfélagsmiðlum. Egill Helgason fjölmiðlamaður spurði á Facebook: „Er þetta ekki frekar ógeðslegt?“

Honum var svarað af Heiðu B. Heiðarsdóttur sem starfar á Stundinni.  „Æjú, mér finnst það. Líka bara innilega plebbalegt og hallærislegt.“ Guðmundur Andri Thorsson tók undir með Agli en á meðan vildi Marta María Jónasdóttir ritstjóri Smartlands meina að þetta væri einfaldlega framtíðin.

„Væri ekki bara nær að finna fallegan hvolp? Þetta vísar inn í framtíðina, vissulega – en kannski ekkert sérlega geðslega framtíð?“ svaraði Egill þá. Árni Snævarr fyrrverandi fréttamaður lagði orð í belg: „Ólafur Ragnar hlýtur að vera grænn af öfund ef hún klónar hann ekki líka.“ Pétur Örn Guðmundsson tónlistarmaður tók í svipaðan streng og sagði: „Bara svo lengi sem hún klónar ekki Ólaf.“

DV spyr – Er ógeðslegt, svo notuð séu orð Egils að klóna gæludýr? Taktu þátt í könnun DV.