Peter Jackson, leikstjóri Lord of the Rings-myndanna, hefur undanfarin fjögur ár unnið að því að gæða gömul myndbrot af breskum hermönnum í fyrri heimsstyrjöldinni nýju lífi.

Óhætt er að segja að útkoman sé ekkert minna en stórkostleg og fáum við algjörlega nýja sýn á styrjöldina sem stóð yfir frá árinu 1914 til 1918.

Jackson fór yfir hundruð myndbanda sem til eru á Imperial War-safninu í Bretlandi. Verkefnið var býsna tímafrekt enda gömlu myndböndin svarthvít með litlum gæðum. Myndböndin voru færð í lit, þau hreinsuð og má segja að gæðin séu eins og best verður á kosið.

Myndbönd Peters, sem munu birtast í heimildarmynd um fyrri heimsstyrjöldina, verða frumsýnd í BFI Southbank-kvikmyndahátíðinni í London á morgun. Þar mun Peter sjálfur sitja fyrir svörum. Myndin sem um ræðir er 90 mínútur og þar verða meðal annars sýnd viðtöl við hermenn úr fyrri heimsstyrjöldinni sem tekin voru árið 1964.