Gylfi heimsækir gamla félaga Það verður fjör í ensku úrvalsdeildinni á laugardag en klukkan 15.00 fara Jóhann Berg Guðmundsson og félagar í Burnley í heimsókn til Crystal Palace. Jóhann skoraði í síðasta leik Burnley í deildinni sem var hans fyrsta mark í ár. Gylfi Þór Sigurðsson verður í eldlínunni hjá Everton þegar liðið fer í heimsókn til Tottenham síðdegis á laugardag. Gylfi lék í nokkur ár með Tottenham og mun því hitta gamla vini á Wembley. Í næstefstu deild verður Hörður Björgvin Magnússon í baráttunni með Bristol City er Norwich mætir í heimsókn, Jón Daði Böðvarsson fer með Reading í heimsókn til Hull. Birkir Bjarnason gæti verið að fara frá Aston Villa en liðið heimsækir Nottingham Forrest síðdegis á laugardag.

Alfreð fer aftur af stað Eftir jólafrí í þýsku úrvalsdeildinni fer hún aftur af stað um helgina en Alfreð Finnbogason verður í fullu fjöri með Augsburg sem tekur á móti Hamburg SV á laugardag. Alfreð skoraði þrennu í síðasta leik sínum fyrir jól og er líklegur til afreka á nýju ári. Hann er í baráttu um gullskóinn í deildinni. Aron Jóhannsson gæti svo fengið tækifæri með Werder Bremen er liðið tekur á móti Hoffenheim, íslenski sóknarmaðurinn sem leikur með Bandaríkjunum hefur gengið í gegnum erfiða tíma og lítið spilað.

Fanndís í fjöri í Frakklandi Kantmaðurinn knái, Fanndís Friðriksdóttir, og félagar í Marseille þurfa á sigri að halda þegar liðið heimsækir Montpellier. Fanndís og félagar sitja í neðsta sæti deildarinnar með sex stig eftir tólf leiki en liðið þarf þó bara einn sigur til að koma sér úr fallsæti. Á mánudag er svo áhugaverður leikur í Ísrael þegar Viðar Örn Kjartansson og liðsfélagar hans í Maccabi Tel Aviv fara í heimsókn til Maccabi Haifa. Viðar hefur verið að raða inn mörkum og er líklegur til afreka á mánudag.