Emil Hallfreðsson, leikmaður íslenska landsliðsins, spilaði 85 mínútur í dag er liðið tapaði 3-0 gegn Belgíu.
Emil segir að spilamennska liðsins í kvöld hafi klárlega verið betri en gegn Sviss í 6-0 tapi á laugardag.
,,Mér fannst við byrja ágætlega eða af krafti myndi ég segja. Svo fengu þeir þetta víti sem var svolítið svona..” sagði Emil.
,,Þeir voru mikið með boltann og við að verjast og loka svæðum en það virkaði þéttar en í síðasta leik. Við fengum þetta víti á okkur og svo fast leikatriði sem við eigum að vera betri í að verjast.”
,,Í seinni hálfleik fengum við smá sjálfstraust í að halda boltanum, þeir komnir í 2-0 og náðum að skapa okkur aðeins en eins og ég segi, 2-0 hefði verið eðlilegt. Við erum að spila gegn liði sem er númer tvö á heimslistanum.”
,,Ég var vel tæpur fyrir leik, maður var smá smeykur við þennan leik þannig séð því maður hefur ekki æft á fullu undanfarið en mér leið ágætlega.”