Twitter hefur ákveðið að loka fyrir fullt og allt á hægrimanninn og samsæriskenningasmiðinn Alex Jones og vefsíðu hans Infowars. Jones er vægast sagt umdeildur í Bandaríkjunum en hann heldur því meðal annars fram að bandarísk stjórnvöld hafi staðið á bak við hryðjuverkaárásirnar 11. september 2001. Hann hefur einnig haldið því fram að fjöldamorðið í Sandy Hook grunnskólanum 2012 hafi ekki átt sér stað og hafi verið sviðsett af yfirvöldum til að hafa ástæðu til að þrengja vopnalöggjöfina.

Ástæðan fyrir útilokun Jones er gróf hegðun hans á samfélagsmiðlinum. Jones hefur einnig verið útilokaður frá streymiþjónustunni Periscope. Jones birti myndband á heimasíðu Infowars út af þessu og sagði meðal annars:

„Það er búið að loka á mig. Ekki af því að við höfum logið heldur af því að við segjum sannleikann og af því að við erum óvinsæl.“

Jones stofnaði Infowars 1999 og hefur síðan byggt upp traustan hóp fylgjenda. Hann hefur þó mætt ákveðnu mótlæti undanfarið við að koma boðskap sínum á framfæri því miðlar á borð við Facebook, YouTube, Spotify og Apple hafa fjarlægt efni frá honum. Þetta hefur auki þrýstinginn á Twitter að gera hið sama og nú hefur miðillinn látið undan.