Paul Ince, fyrrum leikmaður Manchester United, segir að félagið sé að spila hættulegan leik við stjóra liðsins, Jose Mourinho.
Mourinho vill fá nýja leikmenn inn í sumar en það hefur lítið gengið hingað til og er Portúgalinn að verða pirraður.
,,Jose hefur sagt það að hann vilji vera hjá United út ferilinn en það eru flestir sem myndu segja það,“ sagði Ince.
,,Stjórar eiga það til að verða pirraðir. Þeir vilja fara áfram með félaginu og byggja upp og fá leikmenn inn. Hann sér Liverpool eyða og vill keppa við þá.“
,,Ef hann fær ekki stuðninginn frá Ed Woodward og eigendunum þá mun hann verða pirraður.“
,,Ef Jose finnur fyrir því að hann sé ekki að fá stuðning til að vinna titilinn þá er stór möguleiki á að hann segi upp.“