,,Það var ekki mikið sem kom á óvart, við biðum eftir þessu óvænta. Það er alltaf talað um hvað Sampaoli er mikill snilingur, meira held ég að þetta sé hvað hann getur verið óútreiknanlegur. Það kom ekki neitt,“ sagði Freyr Alexandersson sem sér um að leikgreina andstæðinga Íslands á HM.

Freyr fer vel yfir andstæðinga sína og kemur skilaboðum til Heimis sem vinnur svo úr þeim.

,,Varnarleikur okkar tók vopnin frá þeim, við tókum allt svæði fyrir aftan okkur í burtu. Hjálparvörnin var eitthvað það besta sem ég hef séð í fótbolta, ekki bara í íslenskum fótbolta heldur bara yfir höfuð. Við vorum með þá, mér leið vel.“

,,Það er ekki hægt að lýsa þessu, þetta er ótrúlega gaman þegar þetta gengur upp. Sem betur fer hefur þetta gengið vel upp á síðkastið, maður er stressaður allan tímann að öll vinnan sem hefur farið í þetta verði uppljóstruð með einhverju óvæntu. Þegar maður er með plan A og plan B og það tekst, það er ólýsanlegt. Þetta myndi aldrei ganga upp nema að strákarnir í liðinu eru með svo svakalegan fótboltaheila, þetta er ekki eðlilegt. Hvað þeir eru duglegir og samvinna þeirra í liðinu, ég veit að það að er búið að tala um þetta oft. Þetta er samt einstakt, hvernig þetta var framkvæmt.“

Jorge Sampaoli, tilkynnti byrjunarlið Argentínu sólarhring fyrir leikinn. Hvernig fannst íslenska hópnum það?

,,Ég var bara hissa, ég vissi ekki hvort ég átti að túlka þetta sem hroka eða sjálfstraust. Þetta var ekki vanaleg vinnubrögð, ég hafði tékkað á þvi. Við vorum búnir að giska á þetta byrjunarlið, þetta kom ekki á óvart. Þetta gaf okkur svigrúm til að slaka á og skoða aðra hluti.“

Viðtalið er hér að neðan.