„Ég er kominn með 125 tegundir og markmiðið er að vera fyrstur hérlendis til þess að fylla „dex-ið“,“ segir Arnar Bjarni Arnarsson, tvítugur Pokémon-þjálfari. Sannkallað Pokémon-fár hefur gripið heimsbyggðina alla og á höfuðborgarsvæðinu má sjá fólk á öllum aldri niðursokkið í snjallsímana í leit að vasaskrímslum, sem það reynir að klófesta.

Alls eru til 151 tegundir í þessari fyrstu útgáfu leiksins en nýlega bárust fregnir af því að Bandaríkjamaður hafi klófest allar þær verur sem fáanlegar eru þar í landi. Arnar hyggur á hið sama hérlendis, en veit af nokkrum spilurum sem narta í hælana á honum. Eftir ítarlega úttekt DV á stöðu mála er ekki annað að sjá en að Arnar Bjarni sé fremstur meðal jafninga, enn um sinn.

Aðspurður hvað sé leyndarmálið þá segir Arnar að eggin séu að reynast honum mikilvæg. Til útskýringar fyrir þá sem koma af fjöllum þá er ekki aðeins hægt að veiða Pokémona heldur er einnig hægt að láta þau klekjast út úr eggjum. Til þess þarf viðkomandi að labba eða hjóla og eftir tvo, fimm eða tíu kílómetra klekjast út pokémonar. Arnar Bjarni hefur gengið um 220 kílómetra síðan hann hóf að spila leikinn.

„Ég verð reyndar yfirleitt fyrir vonbrigðum nú orðið því yfirleitt fæ ég Pokémona sem ég á fyrir,“ segir Arnar Bjarni og gefur í skyn við blaðamann að hann muni bugast ef enn einn „Krabby“ bíði hans í næsta eggi.

Þá hafa næturnar reynst Arnari Bjarna vel. „Ég hef lengst verið til sex um morguninn að labba og taka yfir „pokegyms“,“ segir Arnar Bjarni. Um er að ræða stöðvar þar sem þjálfarar berjast með vasaskrímslunum sínum. Mikil samkeppni ríkir um þessar stöðvar en óhjákvæmilega er sú samkeppni lítil sem engin þegar flestir eru sofandi.