Hope Cheston var aðeins fjórtán ára gömul þegar rúmlega tvítugur karlmaður nauðgaði henni á hrottalegan hátt árið 2012. Maðurinn, Brandon Zachary, starfaði sem öryggisvörður þegar hann réðist á Hope fyrir utan heimili í Jonesboro í Georgíu-ríki.

Hope var stödd í gleðskap þegar hún brá sér af bæ og varð hún í kjölfarið fyrir árásinni. Eins og gefur að skilja voru afleiðingar árásarinnar miklar; Cheston hefur átt erfitt uppdráttar eftir árásina og glímt við andlega erfiðleika.

Á dögunum var kveðinn upp dómur í stefnu Hope gegn öryggisfyrirtækinu sem Brandon starfaði fyrir, Crime Prevention Agency. Ákvarðaði kviðdómur að fyrirtækið skildi greiða Hope einn milljarð Bandaríkjadala í bætur vegna árásarinnar, en það er upphæð sem nemur rúmum hundrað milljörðum króna.

Árásarmaðurinn, Brandon Zachary, nú 28 ára, var dæmdur í tuttugu ára fangelsi fyrir árásina og hóf hann afplánun dómsins árið 2016.

Lögmaður Hope fagnaði dómnum og sagði að hann sýndi að ekki væri hægt að setja þak á bætur í kynferðisbrotamálum. Óvíst er þó hversu mikið Hope fær því öryggisfyrirtækið sem um ræðir er ekki metið á svo háa upphæð, milljarð dala. New York Times greinir frá því að um sé að ræða hæstu bætur sem dæmdar hafa verið í kynferðisbrotamáli í Bandaríkjunum.