Áratugum saman hafa samsæriskenningar verið á lofti um að Hitler hafi ekki framið sjálfsvíg á lokadögum síðari heimsstyrjaldarinnar og hafi flúið til Suður-Ameríku í kafbát og haldið sig þar eftir stríð. En nú ætti að vera óhætt að leggja þessar samsæriskenningar á hilluna ef miða má við rannsókn franskra vísindamanna. Þeir segja að Hitler hafi dáið í Berlín á lokadögum stríðsins og hafi því ekki farið lönd né strönd.

Frönsku vísindamennirnir fengu aðgang að kjálkabeini sem er í vörslu Rússa. Kjálkabeinið hefur verið í vörslu sovésku og síðar rússnesku leyniþjónustunnar síðan á fimmta áratugnum. Með því að bera kjálkabeinið saman við tannlæknaskýrslur Hitlers komust vísindamennirnir að þeirri niðurstöðu að kjálkabeinið er úr Hitler. Rétt er að hafa í huga að rugla kjálkabeininu ekki saman við höfuðkúpu með skotgati sem er einnig varðveitt í Moskvu en hugsanlegt er talið að höfuðkúpan sé af konu.

Vísindamennirnir hafa birt niðurstöður rannsókna sinna í vísindaritinu European Journal of Internal Medicine.

Niðurstaða rannsóknarinnar styður einnig við hina opinberu sögu um að Hitler hafi tekið blásýru og skotið sig í höfuðið í neðanjarðarbyrgi sínu í Berlín. Því næst hafi SS-hermenn hellt bensíni yfir lík hans og brennt það.

Sovéskir hermenn fundu síðan líkamsleifarnar sem höfðu verið grafnar í skyndingu. Kjálkabeinið var flutt til Moskvu þar sem það hefur verið geymt bak við lás og slá hjá leyniþjónustustofnunum.