Hugrekki og kraftur níu ára stúlku varð líklegast til þess að móðir hennar lét ekki lífið í grófri árás á heimili þeirra mæðgna. Það var aðfaranótt föstudags í síðustu viku að grímuklæddur maður, vopnaður öxi, réðst inn á heimili þeirra og á móður stúlkunnar. Lögreglan segir að árásin hafi verið óvenjuleg og einstaklega gróf. Konan, sem er 43 ára, býr í Greve í Danmörku og átti hún sér einskis ills von þessa nótt.

Skömmu fyrir klukkan þrjú um nóttina réðst grímuklæddur maður inn á heimili hennar og réðst á hana með öxi. Ekstra Bladet skýrir frá þessu. Samkvæmt heimildum blaðsins þá náði stúlkan að flýja til nágranna sem hringdu strax í lögregluna. Áður réðst maðurinn á stúlkuna og sló hana í andlitið.

Maðurinn veitti konunni alvarlega áverka. Hann braut báða handleggi hennar, fótlegg, rifbein og slagæð í höfði rofnaði þegar hann lamdi hana í höfuðið með öxinni. Konan lifði árásina aðeins af af því að hún varðist kröftulega.

Undirréttur í Hróarskeldu hefur úrskurðað manninn í gæsluvarðhald til 7. júní. Hann er fertugur og segir Ekstra Bladet að hann hafi átt í ástarsambandi við konuna þar til nýlega þegar hún sleit sambandinu. Maðurinn neitar allri sök.