Þýskir fjölmiðlar eru fljótir að bregðast við stórkostlegum útisigri íslenska kvennalandsliðsins í gegn knattspyrnu gegn Þýskalandi í Wiesbaaden, 3-2, og þeim þykir öllum ljóst að þessi úrslit eru mikil tíðindi í kvennaknattspyrnunni.
„Sögulegur ósigur“ og „Þýska kvennalandsliðið með sögulegan ósigur gegn Íslandi,“ segir þýska stórblaðið Bild í vefútgáfu sinni.
Bild dregur fram að þetta er fyrsti ósigur þýska kvennalandsliðsins í undankeppni HM í heil 19 ár og að með þessu tapi hafi liðið fengið Íslendinga að hlið sér á toppi riðilsins.
Knattspyrnuvefurinn Kicker er með nokkuð sérstæða fyrirsögn í frétt sinni af leiknum: „Brynjarsdóttir og co sýndu þýsku landsliðskonunum takmarkanir þeirra,“ en Dagný Brynjarsdóttir skoraði tvö mörk í leiknum.
Þjóðverjum er tamt að grípa til orðsins „ískalt“ þegar lýst er góðri frammistöðu íslenskra landsliða og Kicker víkur ekki frá þeirri venju: „Nokkrir veikleikar komu í ljós í þýsku vörninni sem íslensku konurnar nýttu sér á ískaldan hátt og unnu að lokum sanngjarnan sigur, 3-2.“
„Þýska kvennalandsliðið tapar fyrir Íslandi“ segir íþróttadeild sjónvarpsstöðvarinnar ARD á vef sínum. Segir í þeirri umsögn að þýska liðið hafi gert sig sekt um skelfileg mistök í vörninni og verið bitlaust í sókninni. Núna sé toppsæti í riðlinum sem og þátttökuréttur í lokakeppni HM í mikilli hættu.
Fyrirliði þýska liðsins, Babette Peter, segist hafa orðið fyrir gríðarlegum vonbrigðum og segir meðal annars: „Svona má ekki gerast hjá Þýskalandi.“ Þjálfari liðsins, Steffi Jones, segir að lið hennar hafi verið sigrað með einföldum meðulum og segir að ef liðið breyti ekki snarlega um hugarfar muni taka langan tíma að komast aftur á sigurbraut.
Íslenska liðið hreif áhorfendur
ARD segir jafnframt í umsögn sinni að rúmlega 4.000 áhorfendur hafi hrifist af kraftmikilli spilamennsku íslenska liðsins. Tap Þjóðverja gegn Íslandi hafi verið verðskuldað.