Mál þingmannsins sem var úti að aka. Alþingi vill ekki gefa upp hver þetta er, það má ekki vera „persónugreinanlegt“, en fáum dylst um hvaða þingmann ræðir. Þarna er þingið auðvitað til fyrirmyndar um gegnsæi.

Honum hefur tekist að aka í vinnutengdum erindagjörðum fyrir 4,6 milljónir króna árið 2017. Þetta gera 385 þúsund krónur á mánuði. Glöggir menn hafa reiknað út að hann hafi ekið allt að 140 kílómetra á dag.

En akstur hans hlýtur að hafa verið miklu meiri, því varla er hann að láta vinnustaðinn (Alþingi) greiða kostnaðinn fyrir sig þegar hann fer um í einkaerindum.

Í þessu sambandi má líka geta þess að Alþingi sat í óvenju fáa daga á síðasta ári – ég man ekki alveg töluna. Jú, þingmenn þurfa náttúrlega að vera að störfum þegar þing situr ekki – en þetta gæti þó hafa fækkað ferðum viðkomandi þingmanns frá heimabæ sínum og í Alþingishúsið við Austurvöll.

En í raun hlýtur maður að hafa samúð með manninum ef hann hefur þurft að keyra út í búð eða snatta allskonar – eins og við þurfum öll að gera í lífinu – ofan á allan vinnuaksturinn. Það væru þá hrikalega margar stundir í bíl. Þetta virkar eins og árátta.

Varla er það svo að Alþingi borgi hverja sjoppuferð þingmanna, heldur einungis ferðir sem starfinu tengjast? Hér má sjá reglur um þingfararkostnað á vef Alþingis.