Friðrik Jónsson er hagfróður maður sem stundum skrifar greinar hér á Eyjuna. Hann ritar athugasemd við frétt á vefsíðunni Kjarnanum þar sem haft er eftir Þorsteini Víglundssyni, þingmanni Viðreisnar og fyrrverandi framkvæmdastjóra Samtaka atvinnulífsins, að ekki sé tími til að hækka ríkisútgjöld.

Viðbrögð Friðriks er þessi skilgreining á íslenskri hagfræði:

Íslensk hagfræði:
– Það er ljóst að í kreppu verður að draga saman ríkisútgjöld og í góðæri má ekki auka þau á ný.
– Þegar verðbólga eykst verður að hækka stýrivexti Seðlabankans, en það má hins vegar ekki lækka þá aftur þegar dregur úr verðbólgunni.
– Mæla skal verðbólgu þannig að hún komi lánveitendum sem best og lántökum sem verst.
– Stjórnlaust ris og fall íslensku krónunnar á víxl – þó oftar fall – er forsenda efnahagslegs stöðugleika.
– Fjárfestingar í innviðum, menntun og heilbrigði lands og þjóðar er eitthvað sem við tölum bara um, en gerum lítið í, því það er aldrei rétti tíminn til slíks – þið vitið, vegna mikilvægis samdráttar ríkisútgjalda, baráttu við verðbólgu (hvort sem hún er til staðar eður ei), viðhalds hárra vaxta, sveiflna í gengi og hins alræmda stöðugleika…