Samgöngubylting er í burðarliðnum, segir í leiðara nýjasta heftis tímaritsins The Economist. Þetta mun breyta daglegu lífi, valda ummyndun á borgun og um leið fækka slysum í umferðinni og minnka mengun verulega.
Þessi bylting felst í sjálfkeyrandi bílum sem er hægt að kalla til á stuttum tíma með snjallsímum. Economist nefnir sérstaklega Uber, fyrirtæki sem hefur þegar valdið miklum breytingum á því hvernig fólk ferðast um. Uber starfar nú í að minnsta kosti 425 borgum í heiminum, virði þess er metið á 70 milljarða dollara. En það hefur auga á miklu stærri hlutum, segir í greininni.
En þar eru fleiri stórfyrirtæki komin í spilið og fjárfesta mikið í sjálfakandi bifreiðum. Þar má nefna Apple, Google, Tesla, en einnig bílasmiðjur eins og Ford og Volvo. En Uber, með sitt mikla net, hefur ákveðið forskot. Eins og það er orðað í blaðinu – hvort sem Uber vinnur eða tapar þá erum við öll á leiðinni í Uberheiminn.
Economist segir að í framtíðinni, þegar þjónusta af þessu tagi breiðist út, muni æ fleira fólk velja að eiga ekki bíl. Meðfram því að bílaeign minnkar muni losna mikið pláss í borgum, gríðarleg flæmi sem eru notuð undir bílastæði. Þar verður hægt að byggja hús eða koma upp görðum.
En ef við þýðum þetta yfir á íslenska umræðuhefð má segja að þarna sé á ferðinni gríðarmikil og alþjóðleg aðför að einkabílnum.
