Það verður að segjast eins og er að framboð Viðreisnar er að verða býsna öflugt – öflugara en maður ætlaði fyrirfram. Þær gera talsverðan gæfumun konurnar tvær sem hafa bæst við síðasta sólarhringinn, Þorbjörg Sigríður Gunnlaugsdóttir og Hanna Katrín Friðriksdóttir.

Hanna Katrín er sögð stefna á eitt af efstu sætunum í Reykjavík og sömuleiðis Þorbjörg.

Hanna Katrín var um tíma framkvæmdastjóri Háskólans í Reykjavík, aðstoðarmaður heilbrigðisráðherra á tíma Guðlaugs Þórs Þórðarsonar en síðustu árin framkvæmdastjóri heilbrigðissviðs Icepharma.

Þorbjörg er deildarforseti lagadeildar Háskólans á Bifröst, hún er með framhaldspróf í lögfræði frá Columbia-háskólanum í New York, en starfaði áður hjá embætti ríkissaksóknara.

Báðar voru þær á sinni tíð taldar hallar undir Sjálfstæðisflokkinn, en nú eru þær í fremstu víglínu hjá Viðreisn. Verður að segjast eins og er að miðað við mannvalið í prófkjörum hjá Sjálfstæðisflokknum getur hann dauðöfundað Viðreisn af þessum tveimur frambjóðendum.

En það er athyglisvert að upphafsmaður Viðreisnar og formaður flokksins, Benedikt Jóhannesson, skuli sjálfur ætla í framboð í Norðausturkjördæmi. Þar mætir hann að líkindum Kristjáni Þór Júlíussyni, Sigmundi Davíð Gunnlaugssyni og Steingrími J. Sigfússyni. Þetta er mikið karlaveldi.

Það er alls ekki á vísan að róa með þingsæti fyrir Reykvíkinginn Benedikt í þessu mikla dreifbýliskjördæmi. Hann tekur áhættu með þessu. Benedikt er stærðfræðingur og hlýtur að hafa greint líkurnar. Kannski getur hann komist inn sem uppbótaþingmaður?

En það má Bensi eiga, honum gengur nokkuð vel að manna listana hjá sér.