Tillaga þingmanna um að halda þjóðaratkvæðagreiðslu um Reykjavíkurflugvöll er fyrst og fremst tilraun til að rugla hlutina þegar innan við tveir mánuðir eru til kosninga.
Allir vita að ekki verður hægt að halda svona atkvæðagreiðslu meðfram kosningunum, það er of seint og það er líka ljóst að hún myndi taka of mikla athygli frá þingkosningum.
Í lok október verður kosið nýtt þing sem mun væntanlega geta fjallað um þetta. Þingið sem nú situr er á leiðinni heim. Umboð þess er nokkuð takmarkað.
Sá hængur er líka á að erfitt gæti reynst að boða til kosningar á landsvísu um skipulagsmál innan bæjarfélags. Kannski er það hægt, en það þarf örugglega að kanna hvort lagagrundvöllurinn er fyrir hendi.
Svona kosning gæti ekki verið nema „ráðgefandi“. Síðast var haldin „ráðgefandi“ þjóðaratkvæðagreiðsla á Íslandi 20. október 2012, það var um tillögur stjórnlagaráðs. Ekki var farið eftir úrslitum atkvæðagreiðslunnar, stjórnvöld hafa beinlínis látið eins og hún hafi aldrei farið fram.
Meðan svo er geta aðrar þjóðaratkvæðagreiðslur sem er boðað til með svipuðum hætti ekki verið neitt annað en ómark. Gildi þeirra er ekkert. Fordæmið fyrir því hunsa þær gæti ekki verið skýrara.
Þannig að í raun er þetta markleysa. En þetta getur skapað uppnám og rugling í aðdraganda kosninganna – þegar við getum ímyndað okkur að sé nóg annað að ræða og rífast um.
