Vilhjálmur Þ. Vilhjálmsson segir í Kastljósi að Ólafur F. Magnússon sé vel að því kominn að verða borgarstjóri.

Samt er það svo að framboð Ólafs fékk einungis tíu prósent atkvæða í síðustu kosningum. Það var í sjálfu sér ágætis útkoma, en í því felst engin krafa um að hann verði borgarstjóri eða stuðningsyfirlýsing til þess.

Alls ekki.

Við höfum nýlegt dæmi um stjórnmálamann sem tók að sér embætti sem hann hafði ekki stuðning til að gegna. Halldór Ásgrímsson varð forsætisráðherra 2004. Þetta varð honum til lítillar gleði. Hann hrökklaðist úr stjórnarráðinu löngu áður en hans tími var kominn og lét sig hverfa úr stjórnmálum.

Ólafur er samt strax farinn að tala eins og sá sem valdið hefur. Hann segir að flugvöllurinn verði í Vatnsmýrinni um langa framtíð og að málefnasamningur hans og Vilhjálms sé „70 prósent F-lista plagg“.