Margrét Sverrisdóttir segir á forsíðu Morgunblaðsins í dag að til standi að byggja „hótelkassa“ á Laugavegi 4-6. Hún telur að svoleiðis starfsemi henti illa á þessum stað. Við Laugaveginn eru þegar tvö mjög snotur hótel.

Í sama tölublaði Moggans má lesa að tveir þriðjuhlutar af götuhæð nýja hússins verði verslunarrými.

Varaborgarfulltrúinn hefur semsagt ekki kynnt sér málið sem hún talar svo fjálglega um.

Ætli sé ekki líka fagnaðarefni að hótel séu fremur byggð í Miðbænum en til dæmis austur í Smára?

Svandís Svavarsdóttir líkir húsaröðinni við „perlufesti“.

Ekki get ég ímyndað mér að margir vildu eiga svona ljóta perlufesti. Sem íbúi í Miðbænum og miðbæjarmaður í marga áratugi veit ég að aldrei hefur neinn almennilegur rekstur þrifist á Laugavegi 6. Það sem nú er að finna í þessu ljóta húsi er hrein ömurð.