Mig hefur stundum langað að heyra Tryggva Þór Herbertsson segja frá því hvað gekk á meðan hann var efnahagsráðgjafi ríkisstjórnarinnar síðustu mánuðina fyrir hrun.

Ég tók eftir því að á nýlegum vef Björgólfs Thors var þess getið að Tryggvi hefði þó reynt að koma með einhverjar hugmyndir um hvernig mætti takast á við vanda fjármálakerfisins, það hefðu aðrir ekki haft.

Tryggvi er í viðtali við Austurgluggann – ég les reyndar um þetta á vef Vísis sem vitnar í blaðið austfirska. Þar segist hann hafa verið mótfallinn því að Glitnir yrði yfirtekinn með þeim hætti sem var gert. Tryggvi segir:

„Ég benti ráðamönnum á að ef hin svokallaða Glitnisleið yrði farin þá myndi það skapa Dominoáhrif og kerfið myndi hrynja.“

Tryggvi ræðir einnig um kjör þingmanna – og þar vekur hann athygli á vandasömu máli. Í frétt Vísis er þetta orðað svona:

„Þannig segir Tryggvi að þingstörfin séu mjög ólík því sem hann bjóst við og að þetta sé „miklu meiri vinna og miklu lægri laun en ég hafði nokkurn tímann gert mér grein fyrir.“

Hann telur hættulegt að laun þingmanna lækki en laun óbreytts þingmanns eru nú 520 þúsund á mánuði. Hann telur það skapa hættu á því að „við fáum ekki fólk sem er hæft og þá þynnist út sú þekking sem er á þinginu en jafnframt skapast hætta á því að þingmenn verði berskjaldaðri fyrir því að þiggja peninga annars staðar frá.“ Hann vill meina að slíkt leiði til spillingar og ákvarðana sem „ekki markast af hugsjón heldur þeirri hönd sem fæðir mann.“