Meðbyrinn sem Besti flokkurinn nýtur þessa dagana er hreint ótrúlegur. Nú velta menn helst fyrir sér hvort flokkurinn fái fjóra borgarfulltrúa eða sex. Fjórflokkurinn veit ekki sitt rjúkandi ráð – og maður finnur að það vekur talsverðan fögnuð.

Það er samt allt í lagi að velta fyrir sér hvað bíður Jóns Gnarrs og félaga í borgarstjórn.

Það eru borgarráðsfundir á hverjum fimmtudegi.

Það eru borgarstjórnarfundir annan hvern þriðjudag.

Oft teygist rækilega úr þessum fundum.

Í borginni starfa ótal nefndir þar sem stjórnmálamenn sitja, þær halda marga og langa fundi.

Það eru til litlir peningar til að gera skemmtilega hluti. Niðurskurður verður allsráðandi næstu árin. Borgarstjórn þarf að velta fyrir sér hverri krónu sem verður eytt.

Í borginni er stórt embættismannakerfi sem er afar þungt í vöfum – og getur verið mjög þreytandi að eiga við.

Á einhverjum tímapunkti er hætt við að grínið gufi upp og við taki frekar langdreginn veruleiki.