Menn gera nokkuð úr auknum stuðningi við Ukip, Sjálfstæðisflokk Bretlands, í umræðu hér á landi. Ukip er aðallega þekktur fyrir að vera á móti Evrópusambandinu. Leiðtogi hans, Nigel Farage, situr á Evrópuþinginu, tekur reyndar lítinn þátt í þingstörfum, fyrir utan að þiggja kaupið og hæðast að öllu sem þar fer fram.
Það er auðvitað viss afstaða.
En þess er sjaldan getið hér að aukinn stuðningur við Ukip helgast ekki eingöngu af andstöðunni við ESB, kannski er það ekki einu sinni meginskýringin.
Ukip hefur nefnilega tekið harða afstöðu gegn hjónaböndum samkynhneigðra. Það fellur vel í kramið hjá hluta af kjósendahópi Íhaldsflokksins sem finnst David Cameron vera helsti frjálslyndur.
Fylgi Íhaldsmanna er heldur lítið þessa dagana, það hefur hins vegar farið vaxandi meðal samkynhneigðra. Ný könnun sýnir líka að meira en þrír af hverjum fimm kjósendum eru hlynntir hjónaböndum samkynhneigðra.
