Hvernig á að bregðast við því þegar kvikmyndir verða hin opinbera útgáfa af veruleikanum?
Við sáum þetta til dæmis í The Social Network, myndinni sem fjallaði um Facebook og stofnanda þess, Mark Zuckerberg. Hún var full af villum og vitleysu – sem hefur orðið að einhvers konar sannlíki.
Nú er nýkomin út mynd sem fjallar um handtöku og dauða Osama Bin Laden. Hún nefnist Zero Dark Thirty og er jafnvel spáð Óskarsverðlaunum.
Myndin er sögð vera byggð á sönnum atburðum, en margt í henni er hreinn skáldskapur. Samt er verið að selja hana sem sannleika.
Michael Wolff skrifar í Guardian og segir að myndin sé ekki bara kjánaleg, heldur sé hún líka lofgjörð til pyntinga – þar sem sadismi leikstjórans Kathryn Bigelow fari ekki á milli mála.
Myndin um dauða Osama Bin Laden er full af rangfærslum – hún er sannlíki.
