Íslendingar eru komnir í mikinn ham að breyta alls konar tónlist í jólalög. Ætli tónlistarmenn meðal annarra þjóða séu svona duglegir við þetta?

Bubbi var að reyna að gera Across the Universe, hið heimspekilega Lennonlag, að jólasöng. Kannski fáum við aldrei að heyra það.

Við þurfum stundum að hlusta upp á hrylling sem á íslensku heitir Ef ég nenni – það er upprunalega lag með Ítala sem nefnist Zucchero.

Sonur minn opnaði tölvuna áðan, ég sat við morgunverðarborðið í mesta sakleysi, og heyrði að lagið klassíska með Righteous-bræðrunum, You´ve Got That Loving Feeling er orðið að jólalagi á Íslandi undir nafninu Ég kemst í jólafíling.

Í gær var ég að hneykslast þegar ég heyrði hið klassíska þjóðlag Morning Has Broken – sem er frægast í flutningi Cat Stevens – með íslenskum jólatexta. En þar hefði ég kannski átt að þegja, því Wikipedia segir að þetta gelíska lag sé jólasöngur. Það hljómar þó ekki þannig hjá Cat.