Margir hafa talað opinskátt um vanda Íbúðalánasjóðs síðustu daga – enda er staða hans herfileg.

Meðal þeirra eru Árni Páll Árnason sem var í viðtali í Silfri Egils á sunnudaginn og Sigríður Ingibjörg Ingadóttir í viðtali við Bloomberg sem birtist í gær.

En af einhverjum ástæðum kusu menn að gera ótrúlegt fjaðrafok út af orðum Sigríðar. Jú, hún er þingmaður – en það verður ekki séð að hún sé sérstakur innherji hjá Íbúðalánasjóði.

Hún er einfaldlega að tala um stórt vandamál sem kemur allri þjóðinni við.

Í Kauphöllinni var sett á svið mikið leikrit þar sem viðskipti með bréf sjóðsins voru stöðvuð.

Ekki breytir það þeirri stöðu sem hefur legið fyrir um skeið að ríkið þarf að dæla peningum inn sjóðinn, fyrsti skammturinn verður 12 milljarðar, en þá er vandinn alls ekki leystur.

Bæði Sigríður Ingibjörg og Árni Páll tala um nauðsyn þess að gera gagngerar breytingar á hlutverki sjóðsins, eins og er stendur hann ekki undir sér – og hann þjónar ekki heldur þeim tilgangi að gera landsmönnum kleift að eignast húsnæði á skynsamlegan hátt.

Hér má sjá Silfur helgarinnar, viðtalið við Árna Pál er atriði númer tvö í þættinum, það er undir lok viðtalsins að við tölum um Íbúðalánasjóð: