Jóhanna Sigurðardóttir hefur sent bréf til flokksmanna í Samfylkingunni um að hún ætli að hætta í stjórnmálum í lok kjörtímabilsins og láta af formennsku í flokknum á næsta landsfundi.

Má þá gera ráð fyrir að hefjist barátta um formennsku í flokknum. Jóhanna skilur eftir sig tómarúm, hún bjargaði flokknum þegar hann kom út úr ríkisstjórn hrunsins og tryggði honum áframhaldandi líf í ríkisstjórn.

Mjög óvíst er hver verður formaður eftir hana, Árni Páll Árnason sækist eftir því, en telst varla líklegur, Dagur B. Eggertsson, er varaformaður, en pólitísk staða hans er ekki sérlega sterk. Guðbjartur Hannesson kemur varla til greina eftir klúðrið með laun Landspítalaforstjórans, en einnig er nefnd til sögunnar Katrín Júlíusdóttir sem er að fara að taka við embætti fjármálaráðherra.

Svo má ekki gleyma Össuri Skarphéðinssyni – hann hefur áður leitt flokkinn, spurning hvort hann væri tilbúinn að gera það aftur.