Þegar Jón Ásgeir Jóhannesson sameinast Víglundi Þorsteinssyni í að kvarta undan meðferð bankakerfisins á sér dettur botninn alveg úr.

Jón Ásgeir tilheyrði fámennum hópi manna sem keyrði Ísland í kaf. Um það má lesa í skýrslu rannsóknarnefndar Alþingis. Allt var skuldsett upp í rjáfur – þessi Ponzi- mylla hrundi þegar lánafyrirgreiðslan stöðvaðist. Það skiptir engu máli í þessu sambandi að eitt og eitt fyrirtæki hafi verið rekstrarhæft, eignarhaldsfélögin sem voru búin til utan um öll viðskiptin voru skuldug upp á mörg hundruð milljarða. Þess utan tókst Jóni Ásgeiri og félögum að setja heilan banka á hausinn.

Jóni Ásgeiri tókst reyndar að halda fjölmiðlaveldinu 365 með alls kyns brellum – það er áhyggjuefni.

Víglundur er svosem lítið peð í þessum samanburði – þótt hann hafi lengi verið meðal mestu áhrifamanna innan íslenska lífeyrissjóðakerfisins.

BM Vallá safnaði ógurlegum skuldum í mestu byggingabólu Íslandssögunnar – þegar fyrirtæki af þessu tagi hefði átt að mala gull. Að auki skilaði fyrirtæki ekki reikningum árum saman.

Nú koma þeir báðir fram og leika fórnarlömb. En rullan fer þeim afar illa.