Hún er lífleg umræðan um íþróttamann ársins.

Reglan við þetta val er að boltakarl vinnur ef nokkur möguleiki er á.

Ég var að velta þessu fyrir mér í fyrrakvöld – af einhverjum ástæðum – ég hugsaði, nú fer að koma að vali íþróttamanns ársins, skyldu þeir hafa vit á því að velja hana Anitu? Það væri nú snjallt hjá þeim. Og svo hugsaði ég, nei, auðvitað ekki, þeir velja einhvern úr boltanum.

Og þannig fór það líka – kom nákvæmlega ekkert á óvart.

Þarna er ung og glæsileg íþróttakona sem vinnur fullt af verðlaunum – í einstaklingsíþrótt nota bene. Hún er kosin efnilegasti íþróttamaður Evrópu í sinni grein.

En nei, það er boltamaðurinn sem er valinn, hann hefur reyndar ekki unnið nein verðlaun, en hann spilar með liði í enska boltanum og kemur stundum inn á í leikjum á Englandi – en þar er Mekka íslenskra íþróttafréttamanna. Í huga þeirra verður ekki lengra komist en að spila á enskum fótboltavelli.

Nú vilja menn laga þetta með því að koma upp tvennum verðlaunum, einum fyrir konur, öðrum fyrir karla. Það er einhver púkalegasta hugmynd sem hefur heyrst.