Það virðist ekki vera nokkur leið að hafa stjórn á verðbólgu á Íslandi, ekki einu sinni í lokuðu hagkerfi, innan gjaldeyrishafta. Launþegar eru varaðir við því að fara fram á kauphækkanir – þær muni undir eins brjótast fram í hækkaðri verðbólgu.

Verðbólga er hæst í Evrópu hér á Íslandi. Samkvæmt nýjum tölum mælist hún 4,2 prósent. Þetta hefur náttúrlega veruleg áhrif á verðtryggð lán – og ef verðbólgan verður á þessu róli næstu árin verður þess ekki langt að bíða að skuldaaðgerðir ríkisstjórnarinnar étist upp.

Og það sem er ekki síst merkilegt í þessu er að það er húsnæðisliðurinn sem hefur mest áhrif til hækkunar vísitölunnar.

Lesandi síðunnar sendi eftirfarandi bréf:

„Það er með verðbólguna á Íslandi og samsetningu á vísitölu neysluverðs:

Eins og við var að búast þá er tekinn aftur sami snúningurinn á húsnæðisliðnum í VTN.  Líkt og í húsnæðisbólunni þá er hækkun húsnæðis meginn drifkrafturinn í hækkun VTN og viðheldur þannig +4% verðbólgu.

 Þetta er ekki aðeins óheilbrigt ástand heldur sorglegur vitnisburður um hvernig við nálgumst almennt hluti.

 Hver græðir síðan á þessari fölsun á VTN?  Fjármagnseigendur og sveitarfélög (hærri fasteignagjöld)

 Hverjir tapa á þessari fölsun ?  Almenningur bæði beint og óbeint.“