Það er rakið að kanna hvort ekki sé grundvöllur fyrir innanlandsflug frá Keflavík, hvort sem Reykjavíkurflugvöllur verður lagður niður eða ekki. Eins og staðan er núna þurfa ferðamenn sem koma til Íslands að fara í gegnum Reykjavík – þeir geta ekki lent í Keflavík og flogið beint áfram til Akureyrar eða Egilsstaða.

Og eins er það með fólk af landsbyggðinni sem er að fara til útlanda. Noti það innanlandsflugið þarf að það fara til Reykjavíkur og koma sér þaðan í millilandaflugið sem fer frá Keflavík.

Það væri náttúrlega mikið hagræði að geta tengt þetta saman á tíma þegar ferðamannastraumurinn vex ört, eins og sveitarfélög á Suðurnesjum ætla að skoða.

Það verður líka að segjast eins og er að innanlandsflugið um Reykjavík er í krísu. Farþegum hefur fækkað um 30 prósent síðan 2007, eins og lesa má í þessu viðtali við forstjóra Flugfélags Íslands. Farþegarnir eru ekki nema rúmlega 800 á dag. Háum fargjöldum er kennt um, en það er reyndar alþjóðleg þróun að fargjöld í flugi innanlands eru há meðan fargjöld í millilandaflugi lækka.