Peter O’Toole var af drykkfeldri kynslóð breskra leikara – þetta voru ægilegir bóhemar og fóru illa með sig. Richard Burton, Richard Harris, Oliver Reed, Albert Finney. Það þykir mesta furða að O’Toole hafi orðið 81 árs.
O’Toole var sérkennilegur leikari, hann gat verið alveg hræðilegur og alveg brilljant. Stundum jafnvel í sömu kvikmynd. Oft setti hann á sjálfstýringuna, það var eins og þetta væri allt fyrir neðan virðingu hans, en svo bregður fyrir dýpt og tilfinningu sem er einstök. Hann gat líka verið meinfyndinn.
Eitt frægasta hlutverk O’Toole var í leikritinu Jeffrey Bernard is Unwell eftir Keith Waterhouse. Leikritið fjallar um Jeffrey Bernard, drykkjumann, bóhem og blaðamann, sem þótti afar glæsilegur á unga aldri, en hnignaði svo með drykkjunni. Bernard skrifaði fræga pistla í tímaritið The Spectator um langt árabil þar sem hann lýsti lifnaði sínum. Mikið af pistlunum gerðust á kránni The Coach & Horses í Soho þar sem réði ríkjum Norman, dónalegasti barþjónn á Englandi.
Þegar Bernard var of fullur eða timbraður til að skrifa pistlana í Spectator eða týndur einhvers staðar, birtist ævinlega þessi litla klausa: „Jeffrey Bernard is Unwell“.
O’Toole og Bernard voru drykkjufélagar – það hefur sjálfsagt hjálpað til við túlkun O’Toole í þessu vinsæla leikriti.
Hér má sjá það í heild sinni.
